Op zoondig 12 fibberwarie vanaaf 14:11 oor zulle aoj tiêde herlaeve inne Poort van Limburg. Gezellig same de aoj en now vastelaovendjlidjes mejzînge en sjoenkele op de bekindje melodieë. Én, d’r moôg gedânsj waere.

Ónger ’t genot van ‘n tas koffie met vlaai, ‘n glaeske wiên of ‘n pilske geneête van meziek van d’n Dent, Frénske Adriaens of ’t Rogstaekerskoeër. Lache met ‘ne Buut of eure eige schaele zêiver, sommige dînger zölle noeëts verângere.

Stefan Wolter zâl o.a. zien vastelaovendjschlager 2023 “Ein… Twieë… Drejje!” ten gehuuëre kaome brînge en Boonte Aovendj-coryfee Frénske Adriaens zâl de lachers op ziêne hând kriêge. De middig és neet complieët zónger ’n bezeûk van de Stadspreens van Wieërt, dae same met ziêne kleine collega, de Jeugdpreens van Wieërt, ‘ne groeëte polonaise vuuër zâl gaon. Ouch oeës Huppelpupkes staon alwieër te sprînge en laote gaer heure nowwe dâns aan uch zeen.

Hejjae aaf en tów ’n bitje hölp noeëdig? Des gein probleem, begeleiding és van hérte welkom.
Vae zînge en vae dânse en vae sprînge, de vastelaovendj és wieër in ’t lând. Hieël gaer wis dan!

De entree és € 7,50 inclusief koffie en vlaai. Gae kuntj e kaartje koupe aane kassa of heej alvast in oeëze ticketwînkel.